Kryetari i Lidhjes Demokratike të Kosovës, Lumir Abdixhiku, ka pritur në takim ambasadorin e Italisë në Kosovë, Antonello De Riu.
Gjatë takimit, Abdixhiku dhe ambasadori italian kanë diskutuar rreth zhvillimeve të fundit politike në vend, teksa i kanë vënë theks të veçantë për zgjedhjet e 9 shkurtit.
“Në këtë takim kryetari Abdixhiku dhe ambasadori Antonello De Riu, diskutuan rreth zhvillimeve të fundit politike në vend, veçanërisht për zgjedhjet e 9 shkurtit dhe për përgatitjet e LDK-së për këto zgjedhje. Kryetari Abdixhiku ka folur edhe për tubimet entuziaste pjesë e “Turneu i Ndryshimit”, dhe që qytetarët gjithandej Kosovës po e kërkojnë ndryshimin që LDK po e ofron”, thuhet në njoftimin e Lidhjes Demokratike të Kosovës.
Njëherit, Abdixhiku ka theksuar rëndësinë e këtyre zgjedhjeve për të ardhmen e Kosovës.
“Gjatë takimit, kryetari Abdixhiku theksoi rëndësinë e këtyre zgjedhjeve për të ardhmen e vendit dhe angazhimin e LDK-së për të ofruar alternativa të besueshme dhe zhvillim të qëndrueshëm për qytetarët tanë”, thuhet tutje në njoftim.
Në përfundim, Abdixhiku ka falënderuar ambasadorin italian për mbështetjen që Italia i ka dhënë në vazhdimësi Kosovës./Njeshi/
