Deputeti i LVV-së, Artan Abrashi, ka akuzuar partitë e ish-opozitës se qëllimisht po e bllokojnë konstituimin e Kuvendit duke refuzuar të votojnë kandidaten e tyre për kryetare të Kuvendi, Albulena Haxhiun. Në një intervistë për rtv21 Abrashi ka kritikuar edhe deputetët e PDK-së që nuk morën pjesë në votim për zgjedhjen e kryeparlamentares.
‘’Ekziston një interpretim i Gjykatës Kushtetuese që e detyron secilin deputet që të marrë pjesë në votim sepse udhëheqja e Kuvendit është përgjegjësi e të gjithë deputetëve. Çka po shohim ne është se dy herë radhazi ka tendencë për bllokim nga ana e partive opozitare duke mos marrë pjesë në votim me arsyetimin se ne nuk e përkrahim propozimin e dhënë nga LVV-ja. Propozimi për kryetar të Kuvendit është e qartësuar shumë mirë se i takon subjektit të parë dhe nuk është çështje që e ne e diskutojmë me partitë e tjera sepse kjo krijon një precedent tjetër që edhe ne të ja propozojmë emrat për kryetar. Konsideroj se opozita është shumë mirë e informuar se si duhet të veprohet në këtë situatë, por cili është motivi për bllokimin e Kuvendit kjo është e paqartë, tha Abrashi.
Deputeti Abrashi ka thënë se partitë politike duhet t’i përgjigjen një kërkese të LVV-së për konsultime sa i përket zgjedhjes së kryetarit të Kuvendit. Por, nuk e ka lënë të hapur mundësinë e ndërrimit të emrit të kandidatit të tyre në rast të ndonjë marrëveshje politike.
“LVV edhe përmes një kërkese të zotin Konjufca kërkoi një takim konsultativ tek e fundit nuk ka asgjë të keqe që të ulemi dhe të diskutojmë se si të dalim nga kjo bllokadë e pa arsyeshme. Konsideroj se zgjidhja është shumë e thjeshtë propozimi jonë duhet të votohet që pastaj të kalohet nëpër faza të tjera. Zgjidhja e vetme është respektimi i vendimeve të Gjykatës Kushtetuese dhe respektimi i rregullores së Kuvendit dhe Kushtetutës, kur të kaloj pastaj tek çështja e votimit të Qeverisë atëherë vijnë në shprehje edhe numrat”, tha ai. /Njeshi/
