Ndonëse kanë kaluar më shumë se një muaj nga mbajtja e zgjedhjeve, ende nuk kemi formim të institucioneve të reja.
Në kuadër të diskutimeve për formimin e tyre, kryetari i LVV-së, Albin Kurti si mandatar për krijimin e Qeverisë ka nisur me dërgimin e ftesave për partitë opozitare.
Kurti të dielën i ka dërguar një ftesë për takim konsultativ kryetarit të LDK-së, Lumir Abdixhiku.
Në ftesën e dërguar, Kurti i ka kërkuar Abdixhikut që të takohen nesër më 9 prill në orën 15:00 ose të enjten më 10 prill në orën 09:00 ose 14:00.
Por Abdixhiku ende nuk i është përgjigjur kësaj ftese. Ai madje sot do të ketë një takim me kryesinë e ngushtë të partisë për të diskutuar pikërisht për këtë çështje.
Mësohet se Abdixhiku ka ftuar në takim në orën 16:00 nënkryetarët e partisë Anton Quni, Lutfi Haziri, Doarsa Kica-Xhelili, Gazmend Muhaxheri, Hykmete Bajrami dhe sekretarin e përgjithshëm Imri Ahmeti.
Temë e diskutimit të këtij takimi do të jetë pikërisht ftesa e Kurtit, dhe mbetet për t’u parë nëse Abdixhiku do t’i përgjigjet pozitivisht kësaj ftese. /Njeshi/
