22.8 C
Pec
E enjte, 13 Qershor, 2024

Gjermania i sugjeron Kosovës të ndjek linjën e QUINT-it: Drafti i Lajçakut është i inspriruar edhe nga FES, ka përkrahjen tonë

Premtimi i minutave të fundit nga Kosova për shkrim të një Drafti për Asociacionin të inspiruar nga FES s’ka bindur aleatët për përkrahje në Këshill të Evropës. Kryediplomatja kosovare, Donika Gërvalla, në një reagim pas dështimit për anëtarësim ka thënë se oferta e Kosovës ka humbur aktualitetin dhe relevancën pas mbledhjes së Komitetit të Ministrave ku pika e Kosovës s’u fut fare në agjendë.

Ndonëse oferta e Kosovës nga BE u pa si një gatishmëri që Qeveria e Kosovës të zbatojë diçka që po zvarritet prej vitesh,aleatë insistojnë se Drafti i BE-së për Asociacionin i prezantuar nga emisari sllovak, Miroslav Lajcak, e që ka përkrahjen e shteteve të QUINT-it është rruga përpara.

Në një përgjigje nga Ministria e Punëve të Jashtme të Gjermanisë kanë thënë se Drafti i Lajçak është përgatitur në mënyrë të kujdesshme nga ekspertë dhe juristë evropianë, duke u bazuar në praktikat më të mira të Evropës dhe kanë potencuar se Drafti i Lajcak është i inspiruar në draftet e propozuara më herët, përfshirë edhe Draftin e FES (Friedrich Ebert Stiftung) i prezantuar në vitin 2022.

“Qeveria gjermane e sheh si urgjente nevojën për hapa vendimtar drejt themelimit të Asociacionit të Komunave me Shumicë Serbe dhe lëvizjen përpara të dialogut të lehtësuar nga BE-ja. Drafti i prezantuar nga Përfaqësuesi Special për Dialogun, Miroslav Lajcak, ishte përgatitur me kujdes me ndihmën e juristëve dhe ekspertëve evropianë, duke u bazuar në praktikat ekzistuese më të mira në Evropës. Është inspiruar gjithashtu edhe nga propozimet e mëhershme për Asociacionin, përfshirë edhe atë të FES-it që u prezantua në publik në vitin 2022. Merr parasysh kornizën kushtetuese dhe ligjore të Kosovës. Drafti i Përfaqësuesit Special ka përkrahjen e plotë të Evropës dhe partnerëve transatlantik, Gjermanisë, Francës, Italisë dhe Mbretërisë së Bashkuar dhe SHBA-së (QUINT)”, ka thënë për GE një zëdhënës i Ministrisë së Punëve të Jashtme të Gjermanisë.

Në këtë qëndrim të Berlinit zyrtar  thuhet se avancimi i procesit bazuar në linjat e sugjeruara nga QUINT-i do të demonstronte përkushtimin e Kosovës për të drejtat e minoriteteve, kësisoj edhe forcimin e Kosovës dhe do të ri-energjizonte dialogun e lehtësuar nga BE-ja.

Gjithashtu theksojnë se nëse Kosova do të ndjek sugjerimet e aleatëve, një gjë e tillë do të siguronte dhe përkrahjen më të gjerë për anëtarësimin e Kosovës në Këshill të Evropës.

“Përparimi tani përgjatë linjave të sugjeruara nga QUINT do të demonstronte përkushtimin e Kosovës ndaj të drejtave të pakicave, duke forcuar kështu pozitën e Kosovës dhe duke ri-energjizuar Dialogun e lehtësuar nga BE-ja. Do të siguronte mbështetje të gjerë për aplikimin e Kosovës për anëtarësim në Këshillin e Evropës. Qeveria gjermane do të vazhdojë të mbështesë Kosovën në aspiratat e saj për t’u bërë anëtare e Këshillit të Evropës.”, kanë përfunduar për GE nga Ministria e Punëve të Jashtme të Gjermanisë./Njeshi&T7/

- Advertisment -

Të fundit

Radio 1 – Live Radio 1 – Live
LIVE OFFLINE
track image
Loading...