Kandidati për kryeministër i koalicionit AAK, Nisma, Lista Konservatore dhe Forumi Intelektual E-30, Ramush Haradinaj, ka thënë se autostrada Prishtinë-Dheu i Bardhë do të hapë perspektiva të reja ekonomike për Kamenicën.
“Kamenica meriton më shumë se premtime boshe. Sot, së bashku me kandidatët për deputetë të Koalicionit AAK – NISMA – KONSERVATORËT – E30, nga kjo komunë, Faton Jakupin dhe Fatmir Matoshin, prezantuam planin tonë konkret për zhvillimin e kësaj zone strategjike kufitare.
Vizioni ynë për Kamenicën nuk është thjesht një listë projektesh, por një transformim i plotë që do të ndalë shpërnguljen e qytetarëve dhe do të sjellë zhvillim të qëndrueshëm”, ka thënë Haradinaj.
Haradinaj ka shtuar se Autostrada Prishtinë-Dheu i Bardhë do të hapë perspektiva të reja ekonomike për Kamenicën.
Haradinaj ka folur sërish për rëndësinë e anëtarësimit direkt të Kosovës në NATO.
“Programi ynë kombëtar për anëtarësim direkt në NATO përmes Planit Aksional, ulja e taksave për biznesin privat dhe rritja e pagave e pensioneve janë garanci për një Kamenicë e Kosovë më të fortë.
Ne do të vazhdojmë infrastrukturën e filluar në 2019, por mbi të gjitha do të sigurojmë që çdo investim publik të përkthehet në mundësi reale për qytetarët. Ndryshimi fillon tani – me vendosmëri, me plan konkret dhe me vullnetin e pathyeshëm për të ndërtuar një Kamenicë që i shërben çdo qytetari”, ka përfunduar Haradinaj./Njeshi/
