15 C
Pec
E mërkurë, 22 Maj, 2024

Hoti për marrëveshjen për tunelin Prizren-Tetovë: E vendos Kosovën në pozitë të pafavorshme – mjetet i japim ne, projektin e përzgjedh pala maqedone

Deputeti i Lidhjes Demokratike të Kosovës, Avdullah Hoti ka shkruar “anomalitë e marrëveshjes Kosovë-Maqedoni e Veriut për projektin e tunelit në rrugën Prizren-Tetovë”.

Hoti shkroi në Facebook se “nenet 4 dhe 5 e vendosin palën kosovare në pozitë të pafavorshme dhe vetëm si palë mbikëqyrëse”.

Ndër tjerash, Hoti thotë se “mjetet i paguajmë nga buxheti i Kosovës, por projektin na përzgjedh pala maqedone”.

Postimi i plotë i Hotit:

Anomalitë e marrëveshjes Kosovë-Maqedoni e Veriut për projektin e tunelit në rrugën Prizren-Tetovë

Qeveria e Kosovës dhe Qeveria e Maqedonisë së Veriut kanë nënshkruar marrëveshje për bashkëfinancim për “Përgatitjen e projektit të tunelit në rrugën Prizren-Tetovë”, e cila marrëveshje ka ardhur në Kuvendin e Kosovës për ratifikim.

Marrëveshja si e tillë është e natyrshme, pasi dy vendet duhet të përshtatin parametrat teknik të tunelit. Palët e bashkë-financojnë projektin e tunelit në proporcion me gjatësinë e tij në territorin përkatës.
Deri këtu marrëveshja është e pranueshme.

Por nenet 4 dhe 5 e vendosin palën kosovare në pozitë të pafavorshme dhe vetëm si palë mbikëqyrëse.
Në nenin 4 thuhet:

Kriteret për përzgjedhjen e operatorit për përgatitjen e projektit të tunelit zhvillohen nga “Fakulteti i Ndërtimtarisë në Shkup”;

Procedurat e prokurimit për përzgjedhjen e operatorit për përgatitjen e projektit për tunelin kryhen nga “Ndërmarrja Publike për Rrugët Shtetërore” e Maqedonisë së Veriut.
Në nenin 5 thuhet:

Pala kosovare e transferohen buxhetin e saj në “Ndërmarrjen Publike për Rrugët Shtetërore” të Maqedonisë së Veriut;

Pala kosovare ka rol monitorues në këtë proces.

Kështu që, sipas nenit 5 është e qartë se kjo marrëveshje NUK i siguron palës kosovare rol vendimmarrës, por vetëm monitorues.

Kriteret për përzgjedhjen e operatorit dhe procedurën e prokurimit i kryen pala, respektivisht “Fakulteti i Ndërtimtarisë në Shkup” dhe “Ndërmarrja Publike e Rrugëve Shtetërore” e Maqedonisë së Veriut.

Marrëveshja nuk i jep asnjë rol Fakultetit të Ndërtimtarisë të Universitetit të Prishtinës, apo inxhinierëve të ndërtimtarisë në Ministrinë e Infrastrukturës të Republikës së Kosovës.

Mjetet i paguajmë nga buxheti i Kosovës, por projektin na përzgjedh pala maqedone.

A është kjo qasja “sovraniste” që po e promovojnë këta mashtrues?/Njeshi/

- Advertisment -

Të fundit

Radio 1 – Live Radio 1 – Live
LIVE OFFLINE
track image
Loading...