Ushtria izraelite tha të dielën se goditi një ndërtesë në jug të Bejrutit që përdorej për të ruajtur raketa precize që i përkisnin Hezbollahut.
Sulmi ishte një provë e mëtejshme e një armëpushimi të brishtë midis Izraelit dhe grupit militant të mbështetur nga Irani, shkruajnë mediat e huaja.
Ministri izraelit i Mbrojtjes, Israel Katz, tha në një deklaratë se raketat precize të Hezbollahut “paraqisnin një kërcënim të rëndësishëm për Shtetin e Izraelit”.
Nuk pati komente të menjëhershme nga Hezbollahu.
Sulmi i fundit shton tensionet në armëpushimin e ndërmjetësuar nga SHBA-të që i dha fund konfliktit shkatërrues të vitit të kaluar midis Izraelit dhe Hezbollahut.
“Sulmi i sotëm në periferitë jugore të Bejrutit shkaktoi panik dhe frikë nga dhuna e re midis atyre që dëshirojnë me dëshpërim një kthim në normalitet”, theksoi Jeanine Hennis-Plasschaert, Koordinatore Speciale e OKB-së për Libanin, në X.
“Ne i nxisim të gjitha palët të ndalojnë çdo veprim që mund të dëmtojë më tej mirëkuptimin për ndërprerjen e armiqësive dhe zbatimin e SCR 1701”, shtoi ajo, duke iu referuar rezolutës së Këshillit të Sigurimit të Kombeve të Bashkuara që i dha fund luftës njëmujore midis Izraelit dhe Hezbollahut në vitin 2006.
Presidenti libanez Joseph Aoun u bëri thirrje Shteteve të Bashkuara dhe Francës, si garantues të marrëveshjes së armëpushimit të arritur në nëntor, të detyrojnë Izraelin të ndalojë sulmet e tij.
“Veprimet e vazhdueshme të Izraelit në minimin e stabilitetit do të përkeqësojnë tensionet dhe do ta vendosin rajonin në rrezik real, duke kërcënuar sigurinë dhe stabilitetin e tij”, tha ai në një deklaratë.
Sulmet në Bejrutin jugor kanë rinisur në një kohë përshkallëzimi më të gjerë të armiqësive në rajon, me Izraelin që ka rinisur sulmet në Gaza pas një armëpushimi dy-mujor dhe Shtetet e Bashkuara që kanë goditur Huthit e Jemenit të mbështetur nga Irani në një përpjekje për t’i detyruar ata të ndalojnë sulmet ndaj anijeve të Detit të Kuq.
