Në mbledhjen e sotme të Qeverisë u miratua Byroja Shtetërore për Konfiskimin dhe Verifikimin e Pasurisë së Pajustifikueshme. Kurti që tha se Byroja do ta parandalojë keqpërdorimin e buxhetit të shtetit dhe pozitës zyrtare.
Ndaj Kurtit ka reaguar deputetja e LDK-së, Doarsa Kica- Xhelili.
Ndër të tjerash, ajo i ka kërkuar Kurtit ta shkarkojë ambasadorin Martin Berishaj, ministrat që kanë nënshkruar kontrata njëburimore, “ekipin që kanë abuzuar me rezerva shtetërore” dhe kryetarët e komunave që kanë anuluar tenderë të stadiumeve që sipas Kicës “s’po mund t’i rehatojnë shokët”.
Në fund, ajo ka thënë se Kurti duhet ta shkarkojë edhe vetën sepse “pa bekimin e tij s’do të ndodhnin këto më sipër”.
Kica e ka pyetur Kurtin se a vlen luftimi i korrupsionit për të gjithë përveç tij.
Postimi i plotë:
Shkarkoje Martin Berishajn; Trego ku kanë shkuar milionët e tërhequra të Martinit nga GEN-i serb; Shkarkoje çdo ministër që ka nënshkruar kontrata sekret me dosta në tavolinë, deri tash mbi 250 milion; Shkarkoji ministrat që po i mbyllin tenderët, po ia rrisin çmimin, e më pas po ia japin kompanive të dyshuara për korrupsion; Shkarkoje krejt ekipën që abuzoi me rezervat shtetërore, dhe mundësisht mos i jep qasje në sekrete shtetërore miqve; Shkarkoji kryetarët e komunave që “u lodhën” duke anuluar tender stadionesh se s’po mund t’i rahatojnë shokët; Shkarkoji të gjithë militantët tu nga të gjitha Bordet që po punësojnë të padijshëm me librezë; Në fund, një vet-shkarkim meqë të gjithë e kemi të qartë se asnjëra nga këto më sipër nuk do të ndodhte pa bekimin tënd; Pastaj, pa asnjë problem, vazhdojmë me ligjin për Byronë.
