Një nderim për një figurë të shquar: Vincenzo Paglia, Doctor Honoris Causa i Universitetit “Haxhi Zeka”
Në një kohë kur angazhimet etike, sociale dhe arsimore përbëjnë sfida të mëdha për shoqëritë tona, emërimi i arqiepeshkvit Vincenzo Paglia (Vinçenco Palja) si Doctor Honoris Causa nga Senati i Universitetit “Haxhi Zeka” është një nderim i merituar dhe simbolik për kontributin e tij të jashtëzakonshëm për popullin e Kosovës, në kohë të vështira e më të lehta. Vendimi i marrë sot, më 24 shkurt 2025 dhe dorëzimi personal i çmimit në gjysmën e dytë të marsit në Pejë, reflekton angazhimin e tij të palodhshëm për promovimin e lirisë, të drejtave të njeriut dhe arsimit në rajonin e Kosovës dhe në tërë botën.
Ky lajm konfirmohet për ‘RADIO 1’ nga Rektori i Universitetit ‘Haxhi Zeka’, prof. Dr. Armand Krasniqi.
‘Nga fillimet e tij pastorale, arqiepeshkvi Paglia ka qenë figurë udhëheqëse, e cila nuk është frikësuar të ndërmjetësojë në situata të vështira dhe të sjellë mirëbesim edhe aty ku ka pasur ndarje të thella. Në kontekstin e Kosovës, ai luajti rol kyç në arritjen e një marrëveshjeje të veçantë midis autoriteteve të Serbisë, përfshirë diktatorin Millosheviç, dhe përfaqësuesit legjitim të shqiptarëve të Kosovës, dr. Ibrahim Rugovës – që solli kthimin e fëmijëve shqiptarë në sistemin shkollor dhe krijoi kushtet për zhvillimin e të drejtave themelore të njeriut. Përpjekjet e tij diplomatike dhe ndërmjetësimi i vendosur, i cili përfshiu edhe lirimin nga pengmarrja të Presidentit Rugova gjatë luftës, më 1999, kanë kontribuar thellësisht në promovimin e lirive dhe të drejtave të njeriut në një rajon që përballoi sfida të skajshme. Kjo veprimtari jo vetëm ka ndikuar në përmirësimin e arsimit, por ka krijuar gjithashtu një klimë dialogu dhe bashkëpunimi që vazhdon të ndikojë pozitivisht në zhvillimin shoqëror dhe demokratik të Kosovës.’-thuhet tutje në arsyetim.
‘Por, dashuria dhe kontributi i Imzot Paljes për Kosovën nuk përmbyllet këtu. Ai vazhdoi ta mbante në zemër popullin dhe Republikën e Kosovës dhe të angazhohej për të. Sot, ai promovon përpjekjet e Republikës sonë për konsolidim të marrëdhënieve diplomatike me Selinë e Shenjtë (Vatikanin). Ai është promovues e bashkëpunues i paepur i shtetit të Kosovës për afri gjithnjë e më të madhe me Selinë e Shenjtë.’
Në një mjedis ku vlera tradicionale përballen me sfidat e modernitetit, angazhimi i imzot Paljes në fushën e etikës, bioetikës dhe çështjeve familjare është bërë një udhërrëfyes për brezat e rinj. Si president i Akademisë Pontifikale për Jetën dhe Grand-Kancelar i Institutit Pontifikal “Juan Paul II” për Studime për Martesën dhe Familjen, ai ka shërbyer si një zë frymëzues në përpjekjet për të bashkuar shkencën, teknologjinë dhe humanizmin me parimet themelore të drejtësisë dhe solidaritetit. Në këtë kontekst, roli i tij si këshilltar shpirtëror për Komunitetin e Shën Exhidios (Sant’Egidio) është po kaq i rëndësishëm, duke nxitur dialogun ndërfetar dhe duke promovuar një kulturë paqeje dhe mirëkuptimi që tejkalon kufijtë fetarë dhe kulturore.
Emërimi i tij Doctor Honoris Causa nga Universiteti “Haxhi Zeka” është një shpërblim simbolik për përpjekjet e tij të vazhdueshme për përmirësimin e arsimit, mbrojtjen e të drejtave të njeriut dhe promovimin e lirisë në rajon e më gjerë. Ky nderim jo vetëm që thekson rëndësinë e kontributit të tij në zhvillimin e një shoqërie më të drejtë dhe të ndërgjegjshme, por gjithashtu shërben si një shembull për të gjitha institucionet arsimore dhe shoqërore që duhet të inkurajojnë dialogun, inovacionin dhe humanizmin. Dorëzimi i çmimit, i cili do t’i dorëzohet personalisht në Pejë në gjysmën e dytë të marsit, përfaqëson një moment historik që bashkon traditat akademike me përpjekjet për paqe dhe përmirësim social në një nga rajonet më të ndjeshme të Ballkanit.
Në një epokë ku transformimet shoqërore dhe teknologjike kërkojnë një bazë të fortë etike, veprimi i arqipeshkvit Vincenzo Paglia mbetet një shembull i shkëlqyer i përkushtimit ndaj vlerave të lirisë, të drejtësisë dhe edukimit. Ky nderim është një ftesë për të reflektuar mbi rëndësinë e bashkëpunimit ndërmjet institucioneve fetare, akademike dhe shoqërore, për të ndërtuar një të ardhme më të mirë për të gjithë.-thuhet në arsyetimin e vendimit./Njeshi&RADIO 1/
