Kori i Filharmonisë së Kosovës sonte në Pejë sonte me 14 Shtator do të zbres në Pejë.
Nga ora 20:00 në Kishën ‘Shën Katarina’, do buçasin zërat e shpirtit për të kumbuar nga Peja në lartësinë qiellore.
Dirigjimi, kuptohet, i është besuar profesor Memli Kelmendit, emrin që bartë suksese ndërkombëtare.
Disa orë para shfaqjes, Kelmendi i është drejtuar publikut pejan me letër të hapur e shumë emocionale.
Letra e plotë:
Qytetit tim të dashur, Pejës,
Sot, rrugët e qytetit tim të lashtë, Pejës, do të përjetohen ndryshe, do të fryhen me tinguj dhe emra të mëdhenj të muzikës korale, që prej kohësh janë burimi i ëndrrave të mia.
Është e vështirë t’ua përshkruaj emocionet që më kapën, sepse ky është një moment i papërshkrueshëm për mua. Është një përfundim i një udhëtimi të gjatë dhe një fillim i ri që po e ndërtojmë së bashku.
Emrat e muzikantëve të mëdhenj, që ndonjëherë i kam imagjinuar të dëgjoja në ndonjë koncert të madh, ata që më kanë frymëzuar me tingujt e tyre magjikë në ekranin e televizorit, sot do të jenë pjesë e qytetit tim. Asnjëherë në ëndërrat e mia më të bukura nuk kam menduar se kjo dëshirë do të realizohej në mënyrë të tillë të mahnitshme.
Konferenca e madhe “Quo Vadis Choral Music Conference” që po zhvillohet në qytetin tonë të Pejës, nga data 14 deri më 17 Shtator, është organizuar nga ChoralSpace nga Berlini në bashkëpunim të ngushtë me Kori Siparantum (Kosovë). Përpjekja dhe pasionet tona janë përfaqësuar në këtë manifestim të muzikës korale, dhe Peja po krijon ngjyra të reja dhe po çlihet në qiellin e muzikës korale botërore.
Sot, për qytetin tim, po fillon një kapitull i ri historik, ku tingujt e muzikës korale do të jenë melodia që do ta udhëhoqë rrugën e qytetit tonë.
Ju ftoj të jeni pjesë e kësaj historie emocionuese, të na bashkoheni në hapjen e konferencës mahnitëse dhe në Koncertin e Korit të Filharmonisë së Kosovës, një përvojë muzikore e jashtëzakonshme që do të zhvillohet në ambientin e Kishës Katolike “Shën Katerina” në Pejë, me nisjen në orën 20:00.
Kush do ta mendonte se brenda një periudhe të shkurtër kohe, ëndrrat tona më të thella do të përjetoheshin në këtë mënyrë të mrekullueshme!
Mirësevini në këtë udhëtim emocional të muzikës korale, ku tingujt dhe harmonia do të ndriçojnë qytetin tonë të lashtë dhe do ta bëjnë atë edhe më të bukur.
Pejë, kjo është një dhuratë e vogël për ty’-shkruan Memli Kelmendi, Dirigjent i Korit Siparantum./RADIO 1&Njeshi/
