Kosova është në mesin e pesë shteteve të Ballkanit Perëndimor ku do të implementohet projekti i Qeverisë së Mbretërisë së Bashkuar, “Integriteti Gjyqësor”.
Ky projekt ka të bëjë me fuqizimin e pavarësisë së gjyqësorit ndaj ndikimeve politike, mbështetjen e pavarësisë së prokurorive, rritjen e transparencës dhe qasjes së publikut në sistemin gjyqësor, përmirësimin e praktikës së shqiptimit të dënimeve, përforcimin e llogaridhënies dhe menaxhimit institucional, me theks të veçantë në luftimin e korrupsionit dhe mbrojtjen e sinjalizuesve.
Prandaj sot në zyrën e Këshillit Prokurorial të Kosovës ishin mysafirë përfaqësuesit e projektit të ri rajonal të Qeverisë së Mbretërisë së Bashkuar, si dhe përfaqësues të Ambasadës Britanike në Kosovë, të cilët u pritën nga kryesuesi Ardian Hajdaraj.
Takimi, sipas KPK-së, kishte për qëllim prezantimin e projektit dhe diskutimin e mundësive për bashkëpunim të mëtejmë me Këshillin Prokurorial të Kosovës, në funksion të forcimit të integritetit institucional dhe avancimit të reformave në sistemin e drejtësisë.
“Ky projekt, që do të zbatohet në pesë shtete të Ballkanit Perëndimor, përfshirë Kosovën, që implementohet nga organizata Security Criminal Justice Solutions, synon të mbështesë institucionet e drejtësisë për përmirësimin e standardeve të integritetit dhe llogaridhënies. Qëllimet kryesore të projektit përfshijnë, Fuqizimin e pavarësisë së gjyqësorit ndaj ndikimeve politike, Mbështetjen e pavarësisë së prokurorive, Rritjen e transparencës dhe qasjes së publikut në sistemin gjyqësor, Përmirësimin e praktikës së shqiptimit të dënimeve, Përforcimin e llogaridhënies dhe menaxhimit institucional, me theks të veçantë në luftimin e korrupsionit dhe mbrojtjen e sinjalizuesve”, thotë Këshilli Prokurorial.
Thuhet se të dyja palët shprehën gatishmërinë për bashkëpunim të vazhdueshëm dhe theksuan rëndësinë e mbështetjes ndërkombëtare për avancimin e standardeve evropiane të integritetit dhe sundimit të ligjit në sistemin prokurorial dhe gjyqësor të Kosovës./Njeshi/
