Vrasja e liderit të Hezbollahut, Hassan Nasrallah në sulmet ajrore në një periferi të Bejrutit ka vënë në qendër të vëmendjes njeriun që konsiderohet gjerësisht si trashëgimtari i tij, Hashem Safieddine.
Grupi i mbështetur nga Irani konfirmoi se Nasrallah, i cili udhëhoqi grupin për 32 vjet, ishte vrarë në sulmin e së premtes.
Tani ai përballet me sfidën e zgjedhjes së një drejtuesi të ri pas goditjes më të rëndë që grupi është përballur në historinë e tij 42-vjeçare, shkruajnë mediat e huaja.
Këtu janë disa fakte rreth Safieddine, i cili thuhet se i mbijetoi sulmeve izraelite.
Si kreu i këshillit ekzekutiv, Safieddine mbikëqyr çështjet politike të Hezbollahut. Ai gjithashtu është në Këshillin e Xhihadit, i cili menaxhon operacionet ushtarake të grupit.
Safieddine është një kushëri i Nasrallahut.
Departamenti Amerikan i Shtetit e “emërtoi” atë terrorist në vitin 2017 dhe në qershor ai kërcënoi një përshkallëzim të madh kundër Izraelit pas vrasjes së një komandanti tjetër të Hezbollahut.
Deklaratat publike të Safieddine shpesh pasqyrojnë qëndrimin militant të Hezbollahut dhe përafrimin e tij me kauzën palestineze.
Në një ngjarje të fundit në Dahiyeh, bastioni i Hezbollahut në periferitë jugore të Bejrutit, ai deklaroi: “Historia jonë, armët dhe raketat tona janë me ju”, në një shfaqje solidariteti me luftëtarët palestinezë.
Ai ka qenë gjithashtu i zëshëm në kritikat e tij ndaj politikës amerikane.
Në përgjigje të presionit amerikan ndaj Hezbollahut, ai deklaroi në vitin 2017: “Kjo administratë e çmendur e SHBA-së e penguar mendërisht e kryesuar nga (Donald) Trump nuk do të jetë në gjendje të dëmtojë rezistencën”, duke pohuar se veprime të tilla vetëm do të forconin vendosmërinë e Hezbollahut./Njeshi/
