Ministri i Mbrojtjes i Kosovës, Ejup Maqedonci, ka pritur sot në takim ambasadorin e Turqisë në Kosovë, Sabri Tunç Angili.
Maqedonci bëri të ditur se në fillim të takimit ka pranuar urime nga ambasadori turk për rezultatin e zgjedhjeve.
Në vijim të bisedimeve, fokusi ishte te bashkëpunimi bilateral në fushën e mbrojtjes dhe sigurisë, duke theksuar rëndësinë e koordinimit në kontekstin e situatës aktuale gjeopolitike.
“Të dyja palët rikonfirmuam angazhimin për të punuar së bashku në forcimin e sigurisë dhe stabilitetit. Në Kosovë pritet që së shpejti të ndërtohet fabrika e municionit dhe dronëve ‘Made in Kosova’ përmes marrëveshjes së nënshkruar me kompaninë shtetërore turke MKE,” ka shkruar Maqedonci në njoftimin e tij.
