Presidentja e Kosovës, Vjosa Osmani, bëri thirrje për konstituimin e shpejtë të Kuvendit dhe formimin e Qeverisë brenda afateve kushtetuese.
Osmani pas konferencës me sekretarin e Jashtëm britanik, David Lammy theksoi se ka kohë të mjaftueshme deri në mbajtjen e seancës konstituive, duke shpresuar që ky proces të realizohet sa më mirë.
Presidentja theksoi se është e domosdoshme që Kuvendi të konstituohet duke thënë: “Është me rëndësi që sa më parë të kemi konstituimin e Kuvendit dhe formimin e një qeverie, sepse zhvillimet gjeopolitike janë të shpejta dhe globi nuk na pret”.
“Siç e dini, si presidente nuk kam të drejtë vote dhe megjithëse në të kaluarën ka pasur raste kur presidentë janë përfshirë në çështje të koalicioneve, unë i konsideroj ato çështje partiake dhe si të tilla, sipas Kushtetutës, nuk janë përgjegjësi e imja. Jam e bindur se deputetët do të japin maksimumin për të siguruar që seanca të jetë e suksesshme”, ka shtuar Osmani. /Njeshi/
