Parlamenti Europian ka miratuar raportin vjetor mbi implementimin e Politikës së Jashtme dhe Sigurisë, duke vlerësuar arritjet e Shqipërisë në rrugën drejt integrimit europian.
Dokumenti, i hartuar nga eurodeputeti David McAllister, përgëzon përmbylljen me sukses të procesit të shqyrtimit (screening) dhe hapjen e kapitujve të parë të negociatave në vitin 2024.
Raporti thekson ambicien e Shqipërisë për të përmbyllur negociatat e anëtarësimit deri në vitin 2027, duke ftuar vendin të intensifikojë reformat në fushat kyçe, veçanërisht në drejtësi, luftën kundër korrupsionit dhe krimit të organizuar.
“Parlamenti Europian përshëndet përkushtimin e Shqipërisë për reforma dhe vlerëson përputhjen e plotë me politikën e jashtme të BE-së, përfshirë masat kundër Rusisë dhe Bjellorusisë,” thuhet në raport.
Një tjetër element kyç i dokumentit është mbështetja e qartë për institucionet e drejtësisë, në veçanti për SPAK-un, dhe paralajmërimi kundër çdo përpjekjeje për të cënuar pavarësinë e tyre.
“Theksohet rëndësia e një pluralizmi politik funksional dhe një opozite konkurruese. Kërkohet dialog konstruktiv mes mazhorancës dhe opozitës për të tejkaluar polarizimin politik dhe për të garantuar procese demokratike gjithëpërfshirëse,” theksohet më tej. /Njeshi/
