Në kuadër të riparimit të rrugëve në Komunën e Pejës, sot pritet të përfundoj shtrimi me asfalt në rrugën “Eliot Engel”, njëra prej arterieve kryesore dhe më të ngarkuar për qarkullim në këtë qytet.
Shtrimi i asfaltit po bëhet nga, siç banorët e njohin “Rrethi i Dulisë” e deri në përfundim të “Urës së Gurit”. Kjo rrugë përkohësisht është e mbyllur për qarkullim për shkak të punimeve intensive.
Autoritetet lokale po punojnë për të minimizuar ndikimin në trafikun e përditshëm. Banorët dhe drejtuesit e automjeteve janë këshilluar të përdorin rrugë alternative gjatë kësaj periudhe.
Kryetari i Pejës, Gazmend Muhaxheri pak ditë më herët kishte shkruar: “Rrugët e qytetit tonë janë duke u rregulluar për një Pejë më të bukur, më të sigurt dhe më të lehtë për qarkullim!”.
Ndërkaq, ky investim është pjesë e një plani të gjerë për modernizimin e infrastrukturës rrugore e lajmëruar edhe nga Drejtori për Punë Komunale dhe Shërbime Publike në Pejë, Agron Nikqi. /Njeshi/
