Të premten është përuruar nënstacioni policor në Leshak të Leposaviqit.
Sipas njoftimit të Zyrës së Kryeministrit ky objekt, është ndërtuar për më pak se pesë muaj, i ka 2300 metra katrorë dhe ka kushtuar afër 782 mijë euro.
Në përurimin e këtij nënstacioni kanë marr pjesë kryeministri, Albin Kurti, së bashku me ministrin e Punëve të Brendshme, Xhelal Sveçla, drejtorin e Policisë, Gazmend Hoxha, dhe zëvendësdrejtorin e Policisë për veri, Veton Elshani.
Kryeministri Kurti këtë nënstacion e ka quajtur si burim të sigurisë dhe adresë të raportimit për çdo qytetar.
“Me 10 shtator 2024, para më pak se 5 muajsh, kemi vendosur gurthemelin e këtij nënstacioni policor këtu në Leshak të Leposaviqit. Sot ai është i gatshëm, dhe prej tash do të jetë burim i sigurisë dhe adresë e raportimit për çdo qytetar pa dallim që jeton në këtë zonë. Pjesë e ndërtesës është edhe Agjencia për Regjistrim Civil, nga ku mund të marrin shërbimet qytetarët e komunës së Leposaviqit por edhe komunat e fshatrat përreth”, ka shkruar Kurti./Njeshi/
