Këngëtarja e njohur Rita Ora ka mbetur plotësisht e shokuar gjatë shfaqjes së fundit të spektaklit të famshëm “The Masked Singer”, kur zbuloi se burri i saj, regjisori Taika Waititi, fshihej brenda njërës prej maskotave misterioze të spektaklit.
Ylli i muzikës, e cila është pjesë e jurisë së “The Masked Singer”, nuk kishte as idenë më të vogël se nën kostumin e personazhit të çuditshëm ishte pikërisht partneri i saj.
Në momentin e zbulimit, Rita nuk mundi ta fshihte habinë e saj, duke reaguar me emocion të madh dhe duke shpërthyer në të qeshura.
“Nuk e besoj dot! Çfarë surprize! Nuk e kisha menduar kurrë se do ishe ti!” tha këngëtarja mes lotëve të gëzimit.
Waititi, regjisor i njohur për filmat si “Jojo Rabbit” dhe “Thor: Ragnarok”, e kishte mbajtur sekret pjesëmarrjen e tij në spektakël edhe për bashkëshorten e tij, duke e bërë kështu surprizën edhe më të madhe.
“Dëshiroja ta bëja këtë surprizë sa më argëtuese për Ritën dhe publikun. Të shohësh reagimin e saj ishte absolutisht e pabesueshme,” tha Taika pas zbulimit.
Publiku reagoi me entuziazëm dhe ngrohtësi ndaj këtij momenti emocionues, duke e cilësuar atë si një nga momentet më të veçanta të historisë së spektaklit të njohur ndërkombëtar./Njeshi/
