Ambasadori gjerman, Jorn Rohde, bashkë me kolegë nga ambasada e SHBA-së dhe ambasada e Holanës në Prishtinë, kanë shkuar në Deçan për të falënderuar ekipin e Shërbimit të Kërkim-Shpëtimit Malor të Kosovës që para dy javësh kanë shpëtuar dy turiste të huaja të cilat humbën rrugën dhe u përballën me kushte ekstreme në shtegun ndërkufitar High Scardus Trail, përkatësisht në segmentin 3 pranë liqenit të Livadhit në Brezovicë.
Ambasda gjermane në një postim në Facebook tha se Rohde shkoi atje për të “nderuar heronjtë e Kosovës”.
“Sot, Ambasadori Rohde, së bashku me kolegët e ambasadës holandeze dhe të SHBA-së, vizituan Stacionin e Shpëtimit Malor në Deçan për të falënderuar personalisht ekipin e jashtëzakonshëm të shpëtimit”.
“Vetëm dy javë më parë, këta vullnetarë të përkushtuar iu përgjigjën një emergjence lart në shtegun e High Scardus Trail në malet e Sharrit, duke sjellë me sukses dy turistë të bllokuar. Aftësia, përvoja dhe profesionalizmi i tyre bënë diferencën!”, shkroi ambasada.
Rohde shprehu vlerësimin e tij të thellë për punën e jashtëzakonshme të ekipit dhe përkushtimin për t’i mbajtur malet e Kosovës të sigurta për aventurierët./Njeshi/
