Edhe nëse jeni me nxitim, anashkalimi i ushtrimeve të ngrohjes para një stërvitjeje nuk është kurrë një ide e mirë. Marrja e rezultateve më të mira nga stërvitja juaj varet nga ngrohja e duhur.
Ushtrimet e ngrohjes ju japin fleksibilitet më të madh duke relaksuar muskujt. Ato ju bëjnë më të shpejtë dhe hedhin themelet për stërvitje më efektive duke ju lejuar të bëni më shumë me të njëjtën sasi përpjekjesh.
Ngrohja gjithashtu ju mbron nga muskujt e lënduar, dhimbjet dhe sigurisht, lëndimet. Pastaj janë edhe përfitimet psikologjike. Ngrohja e përqendron mendjen tuaj në trup dhe energji, duke ju përgatitur për ushtrimin fizik të kërkuar gjatë stërvitjes.
Por, pavarësisht se sa të rëndësishme janë ushtrimet e ngrohjes për stërvitjen, shumë njerëz nuk i bëjnë ato. Ata menjëherë hidhen në rutinën e tyre, duke kufizuar kështu potencialin e tyre dhe në të njëjtën kohë duke e ekspozuar veten ndaj lëndimeve pa e kuptuar fare.
Së pari, ngrohja duhet të zgjasë nga pesë deri në dhjetë minuta. Kjo është koha optimale për të relaksuar trupin tuaj dhe për t’u përgatitur për përpjekjen e vërtetë. Gjithashtu duhet të siguroheni që t’i ngrohni muskujt që do t’i përdorni gjatë stërvitjes, përndryshe po humbni kohë.
Për shembull, nëse seanca e sotme përqendrohet te këmbët tuaja, ngrohja juaj mund të përbëhet nga disa minuta në pistë vrapimi, e ndjekur nga disa mbledhje.
Për yoga ose Pilates, një ngrohje efektive do të përfshinte lëvizje të buta të qafës dhe shtrirje të shpinës për të liruar shpinën dhe nyjet e tjera para se të filloni stërvitjen.
Pavarësisht nga lloji i ushtrimit që planifikoni të bëni gjatë stërvitjes, ngrohja është e vetmja mënyrë për t’u lehtësuar dhe për të përfituar sa më shumë nga një stërvitje intensive. /Telegrafi/Njeshi/
