Gjykata Kushtetuese e Kosovës ka kërkuar komente nga deputetët e Kuvendit në lidhje me kërkesën e dorëzuar nga deputetja e Aleancës për Ardhmërinë e Kosovës (AAK), Time Kadrijaj, e cila bashkë me 10 deputetë të tjerë ka kërkuar vlerësimin e kushtetutshmërisë së një vendimi të marrë më 5 maj 2025.
Bëhet fjalë për vendimin e Kuvendit për mos votimin e formimit të Komisionit për Votim të Fshehtë, i cili ka për qëllim zgjedhjen e Kryetarit të Kuvendit të Republikës së Kosovës.
Në një letër të dërguar deputetëve të Kuvendit nga Gjykata Kushtetuese, është përcaktuar afati për paraqitjen e komenteve lidhur me këtë çështje.
Deputetët kanë kohë deri më 19 maj për të dorëzuar mendimet apo qëndrimet e tyre.
Ndërkohë, sot po mbahet për herë të 16-të seanca për konstituimin e Kuvendit, duke reflektuar vazhdimësinë e bllokadës institucionale që ka përfshirë procesin pas zgjedhor dhe formimin e organeve të reja të Kuvendit. /Njeshi/
