13 C
Pec
E premte, 17 Maj, 2024

Ulutash: KFOR-i është i përkushtuar të parandalojë çdo rrezik të përshkallëzimit

Komandanti i KFOR-it, gjeneral Ozkan Ulutash, tha se forcat e armatosura paqeruajtëse në Kosovë kanë burime të mira dhe janë të përkushtuara për të parandaluar çdo rrezik të përshkallëzimit.

Ulutash, në një intervistë për “Kosovo Online”, tha se anëtarët dhe partnerët e NATO-s mbështesin plotësisht përpjekjet e përditshme të KFOR-it për të siguruar një mjedis të sigurt për të gjitha komunitetet që jetojnë në Kosovë dhe lirinë e lëvizjes në çdo kohë.

“Dhe kjo është për të siguruar një mjedis të sigurt për të gjithë njerëzit që jetojnë në Kosovë dhe lirinë e lëvizjes, në çdo kohë dhe në mënyrë të paanshme. Prandaj, ne vazhdimisht monitorojmë të gjitha zhvillimet relevante që mund të ndikojnë në sigurinë në mbarë Kosovën dhe stabilitetin rajonal. Ne jemi të përkushtuar për të parandaluar çdo rrezik të përshkallëzimit. KFOR-i ka burime të mira dhe është i krijuar për t’u përballur me të gjitha sfidat që mund të ndikojnë në mjedisin e sigurisë, në përputhje me mandatin tonë të OKB-së”, tha Ulutash.

I pyetur nëse ka mundësi që në rast të përkeqësimit të situatës së sigurisë në veri të Kosovës, KFOR-i të jetë i pari që do të reagojë para Policisë së Kosovës dhe EULEX-it, Ulutash tha se ai kurrë nuk përfshihet në ndonjë spekulim për të ardhmen.

“Unë dhe stafi i KFOR-it nën komandën time jemi të përqendruar në misionin tonë. KFOR-i vazhdon të veprojë si përgjigje e tretë e sigurisë, në bashkëpunim të ngushtë me Policinë e Kosovës dhe Misionin e BE-së për Sundimin e Ligjit (EULEX), të cilët janë reaguesit e parë dhe të dytë të sigurisë. Nga maji i vitit të kaluar, ne kemi dislokuar 1000 ushtarë shtesë në Kosovë, kemi rritur praninë e KFOR-it në veri të Kosovës dhe kemi trefishuar numrin e patrullimeve, duke përfshirë edhe përgjatë vijës kufitare administrative”, u shpreh ai.

Siç tha Komandanti i KFOR-it, ky ishte përforcimi më i madh i misionit të NATO-s në dekadën e fundit për të siguruar që misioni të ketë forcat dhe aftësitë që i nevojiten për të vazhduar të përmbushë efektivisht mandatin e tij.

Ai tha se stërvitja e fundit e Ushtrisë Serbe në Peshter, në të cilën ai mori pjesë si vëzhgues, pasqyron marrëdhëniet efektive ndërmjet KFOR-it dhe Ushtrisë Serbe ndër vite, gjë që konfirmohet nga vëzhgimet e KFOR-it për stërvitjet e kaluara dhe kontaktet e rregullta me shefin e Shtabi i Përgjithshëm i Ushtrisë Serbe.

“Komunikimi i rregullt dhe transparent, edhe me organizatat e sigurisë në Kosovë, është vendimtar për sigurinë e të gjithë njerëzve që jetojnë në Kosovë dhe për stabilitetin rajonal”, theksoi Ulutash.

Kur u pyet nëse numri i pjesëtarëve të KFOR-it planifikohet të rritet deri në fund të vitit 2024, Ulutash tha se së fundi kishte informuar zyrtarët e lartë të NATO-s në Bruksel për trendet më të fundit të sigurisë në mbarë Kosovën dhe rajonin e Ballkanit Perëndimor dhe për prioritetet e KFOR-it në javët dhe muajt e ardhshëm.

Ndërkaq, Komandanti i KFOR-it foli edhe për efektin e lajmeve të rreme. Ai tha se ky fenomen është në rritje.

“Vazhdojmë të shohim përhapjen e lajmeve të rreme, përmes videove, fotografive apo postimeve në rrjete sociale. Kjo është e papërgjegjshme dhe e rrezikshme dhe afekton negativisht mirëqenien dhe sigurinë e të gjitha komuniteteve. Është me rëndësi që të gjithë t’i shohin faktet me kujdes dhe t’i kontrollojnë burimet e tyre. KFOR-i do të vazhdojë të luajë rolin e tij”, u shpreh ai./Njeshi

- Advertisment -

Të fundit

Radio 1 – Live Radio 1 – Live
LIVE OFFLINE
track image
Loading...